سنة أولى ديمقراطية

هو اللى احنا عملناه السبت اللى فات ده كان ايه؟

هو احنا كنا في امتحان ثانوية عامة ولا ايه؟

الشعب كله (بلاش كله 18 مليون اللى استفتوا) كانوا متوترين ... كلهم كانو قاعدين بيذاكروا عشان امتحان الاستفتاء

وطبعا كل واحد ليه طريقة مذاكرة زى ماكلنا عارفين:

1.       اللى بداوا مذاكرة من اول يوم فى الثورة وعارفين ان هما عايزين يغيروا الدستور من اول يوم وده حلم حياتهم زى اللى اتبهدل فى علمى علوم عشانعارف انه عايز يطلع دكتور

2.       وفيه اللى كان عايز يغير الدستور بس نظرا لتغير الظروف وعدم وجود استقرار غير رايه بعد الثورة وقاللك "ماشى نعدل الدستور بس". وده زى اللى حول علمى متأدب عشان اكتشف انه مالوش فى الفيزيا وقاللك "بلاها طب سوقها واقف اصلا وانا عايز اكل عيش اشوفلى كلية قمة برده بس بلا وجع قلب وسهر وتعب" هو ذاكر برده وتعب بس مذاكرة مختلفة

3.       وفيه اللى اتفاجىء بالامتحان! وطلع الدستور يقراه قبليها باسبوع. لا اسفة، يقرا التعديلات. وبعدين يقابل حد زيى اساله هتعمل ايه؟ متنساش تقرا الدستور كله! اصل اجابة السؤال برة التعديلات اصلا!

4.       وفيه بقى النوع اللى مش بيذاكر اصلا وماشى ببركة دعا الوالدين ودول عملوا حادى بادى أو صلوا استخارة أو راح  يسمع كلمة شيخ أو قسيس يديله المفيد عشان ينجز! مهو اكيد اللى ماشى فى طريق ربنا هو اللى بينجح يعنى!

5.       وفيه بقى النوع اللى متفزلك! وانف وقاللك ان مش هشترك معاكو ومراحش اصلا وأجل دور ثانى (انتخابات برلمانية أو رئاسية) ودول بقى كانو حبة من بقية ال 45 مليون اللى مراحوش يصوتوا.

 طيب هو مين نجح بقى؟

بسرعة كده تعرف ان رقم 2 و 4 هما اللى نجحوا ودول الاغلبية. ورقم 1 حسوا ان ماحدش فاهمهم فى البلد دى. و3 من ده على ده.

وطبعا لو الاغلبية نجحت ده معناه ان الامتحان كان سهل وفى مستوى الطالب المتوسط. والحقيقة ان الامتحان ده كان اصعب امتحان مش عشان الاسئلة كانت صعبة لا عشان احنا لسة فى سنة اول ديمقراطية. واللى نجحنا اصلا رقم 2 ورقم 4! لا رقم 1 اللى تعب فى المذاكرة ولا حتى اللى فحت نفسه فى آخر اسبوع (ودول شوية قالوا نعم وشوية قالوا لا).

ماقدرش انكر انى سعيدة بالتجربة (الطابور والحبر الفسفورى وان رأيي غير راى اللى ورايا فى الطابور) بس انا شايفة اننا لسة قدامنا كتير اوى عشان ننجح على اساس علمى وعلى اساس المنطق. وده امتى يحصل؟

-          لما ننمى عندنا القدرة على التحليل والمقارنة والاختيار (وديه شوية كورسات لوحدها اصلا)

-          لما نقرأ الراى والراى الآخر وننزل فى الشارع ونروح ندوات ومحاضرات نتعلم ونعلم سياسة

-          لما ميبقاش اختيارنا فى الاجابات على اساس دينى او على اساس مادة واحدة مش موجودة فى التعديلات اصلا!

-          لما ميبقاش فيه فكر تآمرى ولما حد يسالنى انت هتقولى ايه واقوله اجابتى يقول مش مقتنع  ويروح مورينى فيديو لشيخ او قسيس عكس كلامى خبط لزق

-          لما نبص فى التاريخ ونشوف الدساتير اتغيرت ازاى فى بلاد حصلت فيها ثورات زينا

-          لما الخوف والمجهول ميبقوش سلاح للتهديد والترهيب عشان احدد اختيارى

-          لما ميبقاش اختيارنا من الاجابة هو اللى هيودينا النار او الجنة!

-          لما اصلا ببقى باختار وانا مش خايفة ومش حاسة ان اختيارى هيودى البلد فى داهية لان لو فيه اى من الاختيارين هيودى البلد فى داهية ماكناش عملنا عليه استفتاء اصلا!

-          وقبل كل  ده لما الراجل الغلبان الفقير (اللى هو 40% من المجتمع واكثر) متعلم وقادر يحصل على لقمة عيش عشان يقدر يفكر فى اللى اهم من لقمة العيش. ماحدش مخه بيشتغل عدل وهو جعان.

هتقولوا عليا متشائمة. انا مش متشائنة بس خايفة. خايفة عشات قدامنا مذاكرة كتييير اوى. وده كان امتحان سنة اولى ديمقراطية. مشينا واحدة واحدة وعدينا. بس لازم المذاكرة تكون اكثر ومختلفة عشان الامتحانات اللى جاية اصعب.